Nisin punimet në sheshin “Shatërvan

Sot, filluan punimet, me materiale kualitative, në sheshin “Shatërvan”, që do të jetë një kryevepër pas përfundimit, jo vetëm për vizitorët por edhe për qytetarët tanë.

“Prizreni dallohet pikërisht me këtë shesh dhe duhet t’ia kthejmë sharmin e merituar, por, edhe të krijojmë ambient të përshtatshëm për bizneset dhe t’ia shtojmë vlerën qytetit antik” – u shpreh Kryetari Totaj.

Në këtë projekt përfshihen:

Rehabilitimi i kalldrëmit harkor, kalldrëmit lumor dhe kalldrëmit të rregullt duke e ruajtur tipologjinë autentike;

Largimi i rrasave të gurëve të dëmtuar në trotuare dhe zëvendësimi me granit të vrazhdë me teksturë të ngjashme me kalldrëmin ekzistues;

Largimi i skajoreve nga betoni dhe zëvendësimi me skajore nga graniti natyral;

Realizimi i shtigjeve nga graniti për të verbrit;

Realizimi i pjerrinave për personat me aftësi të kufizuara;

Largimi i të gjitha shtyllave dhe kabllove elektrike dhe rrjeteve tjera kabllore si dhe vendosja e tyre nën tokë;

Nivelimi i lartësisë së sheshit “Shatërvan” me trotuaret të cilat aktualisht janë të ngritura 20 cm e që do të ulet lartësia sipas gjendjes në terren;

Largimi i ujorëve nga betoni dhe krijimi i rënies së ujit me kalldrëm, në formë harkore;

Largimi i kubëzave të betonit në rrugën nga “Art Qendra” deri në Kala;

Largimi i kubëzave të betonit në disa zona tjera brenda zonës së projektit dhe zëvendësimi me kalldrëm;

Realizimi i ndriçuesve vertikal me dekore dhe ndriçim të ngrohtë si dhe adaptimi i atij ekzistues me shtylla të stilit klasik;

Vendosja e ulëseve me stil klasik nga druri dhe metali;

Vendosja e tabelave informuese nga druri;

Vendosja e shportave të mbeturinave me dizajn nga metali dhe druri;

Vendosja e parkingjeve për biçikleta me dizajn të përshtatshëm në zonën e projektit;

Mbjellja e fidanëve të ri në pjesë të caktuara dhe përmirësimi i hapësirave të gjelbra;

Restaurimi dhe konservimi i fasadave në disa objekte;

Restaurimi i mureve të dëmtuara nga guri, në të dy anët e Lumëbardhit;

Rivitalizimi i kejeve përskaj Lumëbardhit;

Rregullimi i ujësjellësit dhe kanalizimit në segmente të caktuara.